हाम्रो नेपाल स्पोर्ट्स, काठमाडौं| सातदोबाटो युथ क्लबलाई १-० ले हराउदै डिफेन्डिंग च्याम्पियन मछिन्द्र फुटबल क्लब, यस वर्षको कतार एअरवेज सहिद स्मारक ‘ए’ डिभिजन लिग च्याम्पियन बनेको छ।
लगातार दोस्रो लिग उपाधि जित्ने क्रममा मछिन्द्रले दुई खेल बाँकी छँदै लिग आफ्नो पक्षमा पारेको छ।
पहिलो खेलमा न्यु रोड टिम विरुद्ध गोल खाएको मच्छिन्द्रले त्यस यता हरेक खेलमा क्लिन सिट राख्दै लिग उपाधि जित्न सफल भएको हो।
जितसँगै अपराजित रहेको मछिन्द्रको ११ खेलबाट २९ अंक पुगेको छ। मछिन्द्रले ११ खेलमा ९ जित र २ बराबरीको नतिजा निकालेको छ।
अब मछिन्द्रले १२औं चरणमा थ्री स्टार र अन्तिम खेलमा नेपाल एपिएफ फुटबल क्लब विरुद्ध प्रतिस्पर्धा गर्ने छ।
नव प्रवेशी सातदोबाटो विरुद्ध राम्रो खेल प्रस्तुत गर्न नसकेको च्याम्पियन मछिन्द्रका लागि अजेरबैजनका खेलाडी नुर्लान नोभ्रुजोभले दोस्रो हाफमा गरेको गोल नै निर्णायक बन्यो। उनले ५३औं मिनेटमा गोल गरेका थिए।
सातदोबाटो भने नतिजा पश्चात छैठौं स्थानमा यथावत रहेको छ।
