हाम्रो नेपाल स्पोर्ट्स, काठमाडौं| सहिद स्मारक ए डिभिजन लिग अन्तर्गत आजको खेलमा सातदोबाटो युवा क्लबले रेलिगेसनमा परिसकेको च्यासल युथ क्लबलाई १-० ले हराउदै सिजनको अन्त्य गरेको छ।
अजायी मार्टिन्सले पहिलो हाफमा गरेको गोला निर्णायक बन्दा सातदोबाटो युथ क्लबले जितसहित कतार एअरवेज सहिद स्मारक ‘ए’ डिभिजन लिगको अन्त्य गरेको हो।
सातदोबाटो स्थित एन्फा कम्प्लेक्सको मैदानमा भएको खेलमा पहिलो हाफको छैठौ मिनेटमा अजायी मार्टिन्सले गोल गर्दै सातदोबाटोलाई सुरुवाती अग्रता दिलाएका थिए।
जितसँगै सातदाबाटोले लिग डेब्यु शानदार तरिकाले गरेको छ, उसले १३ खेलबाट २१ अंक बनाएको छ।
हार बेहोरेको च्यासलले भने केवल ६ अंक जोडेर लिगमा अन्तिम स्थान हात पारेको छ। च्यासलले लिगमा १३ खेल खेल्दा १ जित, ३ बराबरी र ९ हारको नजिता निकाल्यो।
त्यसैगरी आजै दशरथ रंगशालामा भएको अर्को खेलमा हिमालयन शेर्पा क्लब र फ्रेन्ड्स क्लबले १-१ गोलको बराबरी खेलेका छन्।
निकै प्रतिस्पर्धात्मक बनेको खेलको पहिलो हाफ गोल रहित बराबरीमा सकिएको थियो।
खेलको ७३ औं मिनेटमा हिमालयनका दिवस उराउले आत्मघाती गोल गरेपछि फ्रेन्ड्सले १-० गोलको अग्रता बनाएको थियो ।
तर, खेलको ८९ औं मिनेटमा विशन गुरुङले गोल गर्दै हिमालयनलाई १-१ गोलको बराबरीमा ल्याएका थिए ।
यस बराबरीसँगै हिमालयनले १३ खेलमा १४ अंक जोडेको छ। फ्रेन्ड्सले १३ खेलमा ११ अंक जोडेको छ।
