हाम्रो नेपाल स्पोर्ट्स, काठमाडौं| इंग्लिश प्रिमियर लिगमा आर्सनलले लगातार दोस्रो हार बेहोरेको छ। एभर्टनको घरेलु मैदानमा आर्सनल २-१ गोल अन्तरले पराजित भएको हो।
प्रिमियर लिगमा सुरुवाती तिन खेल हारेर राम्रो पुनरागमन गरेको आर्सनलको फर्म अहिले भने खस्किन थालेको छ।
अघिल्लो साता म्यन्चेस्टर युनाईटेड संग ३-२ ले पराजित भएको आर्सनल पाँचौ स्थानबाट खस्किएर अहिले सातौं स्थानमा झरेको छ।
गुडिसन पार्कमा सोमबार राति भएको खेलमा घरेलु टोलीको जितमा रिचार्लीसन र डिमाराई ग्रेले गोल गरे।
आर्सनलका मार्टिन ओडेगार्डको गोल सान्त्वना बन्यो । प्रतिस्पर्धात्मक बनेको खेलको ४४औं मिनेटमा रिचार्लीसनले गोल गरेपनि भिएआरबाट मान्यता नपाउँदा एभर्टन अग्रता लिनबाट चुक्यो।
भिएआरमा उक्त गोलको मुभमा अफसाइड देखिएको थियो ।
पहिलो हाफको इन्ज्युरी समयको थप गरिएको दोस्रो मिनेटमा मार्टिन ओडेगार्डले गोल गर्दै आर्सनललाई सुरुवाती अग्रता दिलाए । उनले काइरनको पासमा गोल गरेका थिए ।
५८औं मिनेटमा रिचार्लीसनको अर्काे गोल गरेपनि पुनः उनको गोलले भिएआरबाट मान्यता पाएन ।
उक्त गोलको मुभमा पनि उनी अफसाइड देखिएको थियो । ७९औं मिनेटमा रिचार्लीसनले गोल गर्दै खेललाई बराबरीमा ल्याए ।
डेमाराई ग्रेको प्रहार क्रसबारमा लागेर फर्कदा रिचार्लीसनले रिवाउन्डमा हेडरमार्फत गोल गर्न सफल भएका थिए ।
इन्ज्युरी समयको थप गरिएको दोस्रो मिनेटमा डेमाराई ग्रेले गोल गर्दै गर्दै एभर्टनलाई पूनरागमन जित दिलाए । उनले आन्द्रे गोमेजको पासमा गोल गर्न सफल भएका थिए ।
जितसँगै एभर्टन १५ खेलबाट १८ अंक जोडेर १२औं स्थानमा उक्लन सफल भएको छ । पराजित आर्सनल २३ अंक जोडेर सातौ स्थानमा रहँदा पाँचौ स्थानमा उक्लने मौका गुमाएको छ ।
-हाम्रो खेलकुद
